【衰過沙士】各大電影屬會暫緩加薪 田雞：我睇唔到啲老闆有開戲計劃
蘋果日報 2019/12/28 06:00
田啟文沙士警匪片
採訪：鍾國仁 攝影：沈健程
香港幾大電影屬會如燈光、美術、製片同動作特技演員等幾乎是每兩年加一次酬金，但因為市道太差，今年4月暫緩加薪，他們願意延後到明年2月才加薪，田啟文（田雞）日前接受《蘋果》專訪時解釋：「2003年因為沙士，大家手足都好好，接近10年冇加價，直至2010年先大幅加咗一次薪，然後就每2年加一次人工。大家都睇到好多老闆如古生（古天樂）、林生（林建岳）、楊生（楊受成）佢哋都係蝕住做，盡量撐住個市，但係長遠個老闆都要賺錢㗎，咁開戲數量先會多。今年係歷史新低，只得43部（實際全年是47部），低過2013年嘅49部，不過出年先係寒冬中嘅寒冬，我睇唔到啲老闆有開戲計劃。」
到底影視圈失業重災區在哪？田雞表示：「主要係前線收日薪嘅散工，因為佢哋唔係必需品係可以替代，好景時候佢哋唔憂做，但而家咁嘅時勢，老闆肯定出埠拍，或者請外援嚟香港拍。我打算遲啲約所有屬會坐低傾吓，進行一次大改革自救，而家嚟緊係一個海嘯式崩盤，大家真係唔可以再用以前嗰套心態做嘢。以往基本工作人員都係以收日薪為主，以後係咪可以收周薪或月薪呢？而且要有折讓價，唔可以再用以前計法，以日薪900蚊人工再計埋OT錢再乘30日等於月薪人工，但佢只做26日，因有4日係假期，一啲折讓價都冇，咁老闆不如畀番日薪，甚至出去拍或唔請本地員工啦！」
近年中港兩地演員和工作人員都因中國票房收入越來越好，不斷加片酬，但到去年影市轉壞，薪金卻並沒有下降，田雞表示：「早排有部印尼戲嚟香港拍，全部帶晒自己人嚟，一個香港crew都冇請，唔請原因係佢哋怕溝通唔到，索性自己帶人嚟。最痛心係大陸有部戲嚟香港拍，不單帶晒自己人嚟，佢哋連插頭、器材都自己帶，除咗租車之外，幾乎唔關你香港事咁，同埋大陸好多係肯收月薪，好多人係一個月畀2萬就搞掂。人哋喺香港仲係專心拍一部戲，唔同香港啲工作人員收日薪嘅話好多時投入度不足嘅，經常係拍拍吓，出面有廣告拍畀錢多啲就會走咗去，但你又唔可以話佢唔啱，因為佢哋冇合約保障，只係散工。」
不過田雞認為僅要求員工減價來提高競爭力不是最佳方法，他說：「提高服務質素先係最重要，我哋要提供嘅服務係優質嘅，其他地區冇嘅先有優勢，大家要有團結心，喺劣境時最緊要有工開，唔好殺雞取卵。」其實現時對香港電影最大打擊是不少電影公司開戲已經選擇不在香港拍攝，田雞表示：「香港嘅電影製作成本已經成為全亞洲最貴，好多公司老闆都會計數，出埠拍或去大陸拍都平過香港好多，咁樣就會令到好多戲唔想喺香港拍，所以喺而家咁嘅時勢，大家手足可能要諗吓係咪可以將就吓，有啲戲如果冇乜budget，係咪可以有數講呢？我覺得而家應該係先求有工開，撐住個市仲有得運作。」
以前香港影市縱使不好景，還可以有大陸市場撐住，依然不愁工作，但沒想到受中美貿易戰及稅務問題等諸多因素影響，大陸影市也好不到哪裏去，今年已經約有2,000間影視公司倒閉，明年估計陸續會有倒閉潮出現，據知現時大陸也有約6成工作人員沒工開。田雞表示：「而家大陸影視行業自己都唔係咁好景，但大陸點都會開戲比香港多嘅，不過人哋有戲開都會先考慮自己友，咁香港工作人員又會少咗個機會。」
以往香港在中國市場最有優勢的是拍警匪片，但現在受反送中事件影響，老闆們也不願拍這類題材，田雞表示：「我覺得出年香港影市情況會比今年更惡劣，同業可能要有心理準備，點樣去面對呢個寒冬。不過有危就有機，戲永遠留畀有能力嘅人。嚟緊我都會幫麥兆輝監製一部《檢察風雲》，雖然大陸審查越嚟越嚴，但用商業去包裝嘅主旋律正能量片會成為主流，搞呢啲題材送審就一定冇問題。而拍商業片佢哋係會信香港導演多啲，咁我哋仲有生機嘅，咪盡量請番多啲自己友去拍。」
到底影視圈失業重災區在哪裏？田雞表示：「主要係前線收日薪嘅散工，因為佢哋唔係必須品係可以替代。」
田雞認為僅要求員工減價來提高競爭力不是最佳方法。
田雞表示：「大陸點都會開戲比香港多嘅，不過人哋有戲開都會先考慮自己友。」
田雞表示：「我覺得出年香港影市情況會比今年更惡劣，同業可能要有心理準備，點樣去面對呢個寒冬。」