26歲嘅蔡思貝係2013年港姐亞軍，當選後即被大台力捧，除此之外，佢仲係新聞人物，唔止喺娛樂版見到佢，甚至喺港聞都見到佢嘅新聞，其中仲有唔少係同車有關，睇嚟佢真係一黐到車就冇好嘢，麻煩纏身。

疑似假學歷事件
2015年《蘋果》踢爆國力書院事件，而當中仲牽涉到一位港姐，唔使問，講得嘅就梗係蔡思貝啦！佢被踢爆喺2013年10月即係當選港姐冇耐，透過國力書院報讀菲律賓比立勤國立大學嘅工商管理學士課程，仲喺11月完成該課程，兼係兩個月後就畢業兼拎埋證書。雖然喺佢嘅入學報名表嘅報名日期同比立勤國立大學所發出的課程紀錄都列佢大約喺2010年2月至3月入學，不過喺2010年蔡思貝正喺德國留學，直到2013年先至返港。

之後，蔡思貝再被踢爆透過國力書院報讀美國威斯康辛州協和大學嘅工商管理碩士課程，而幫佢撰寫推薦信嘅公司東主Tong Suet Ha疑似係其母，而信中未有申報佢哋嘅關係。

邊揸車邊影相
喺去年3月，當時仲係「P牌仔」嘅蔡思貝同男友麥秋成去筲箕灣攞電單車，而當麥秋成同老友DJ朱薰嘅老公譚健榮一齊揸車遊車河時，蔡思貝就揸住架深藍色甲蟲車尾隨，而係行駛途中蔡思貝仲多次拎住手機伸出車外影男友揸電單車，牙煙到呢！

涉危駕致被的士撞
事隔4個月，蔡思貝再次涉危駕，今次仲受傷o添！去年7月蔡思貝出席活動遲到，佢自稱：「唔熟路，同的士有啲碰撞！」不過事發後有讀者透過《蘋果》「爆相爆片」報料，原來當日蔡思貝駕駛嘅甲蟲車，由金鐘紅棉道駛去灣仔時，原本只可直路駛往告士打道，但佢喺燈位突然轉右，而鄰線直行嘅的士收制不及被攔腰撞到。

車牌前後有別
喺早前有報道指蔡思貝嘅車上面車牌號碼前後不一，前車牌最尾個數字由「6」變咗「9」，而當時蔡思貝就解釋話係之前拎車去整，車房老闆份人好好，見蔡思貝車牌刮花咗，就幫佢換咗個車牌，點知換咗一個錯嘅數字上去，而蔡思貝自己都唔知道，亦冇檢查車牌。