電影《我的少女時代》嘅宋芸樺差唔多已經成為校園片嘅代言人，早前佢再拍劉以豪合作另一套台灣校園新片《帶我到月球》。

故事講述劉以豪由2017年回到1997年學生時代，阻止宋芸樺參加小室哲哉海外選成員，當中自然牽涉到唔少90年代嘅經典歌。所以佢哋早前喺新蒲崗接受訪問時，就即場接受《蘋果》嘅考驗，測試佢哋對舊歌嘅認識。宋芸樺同劉以豪就搵咗Twins同李玟(Coco)嘅音樂總監，同曾幫祖兒做過唱片監製嘅著名音樂人Terry(陳明道)，彈咗幾首歌包括劉德華《忘情水》、張國榮《Monica》、張信哲《愛如潮水》、張學友《吻別》、王菲《我願意》，當然唔少得係已故台灣歌手張雨生首電影同名主題曲《帶我去月球》啦！不出所料劉以豪最熟啲歌，先後憑副歌就認到《吻別》、《我願意》同《Monica》，劉以豪話:「最熟是《吻別》，爸爸以前開車時經常放這卡帶。」佢仲將張國榮首《Monica》唱到七情上面，仲擺晒甫士。

至於今次幫我哋客串嘅琴師Terry就話好好玩，兩位好捉到啲key。近日幫Coco同Twins做巡迴演唱會，上次四川地震都在場，佢話:「我當時走咗落街買嘢食，佢哋係間房就feel到間房搖。」原來Terry入行時就係做電影音樂，一畢業返嚟香港，就係幫王家衛嘅《阿飛正傳》做音樂，佢話:「其實自己興趣都係電影，有機會會再做返。」

場地：香港九龍貝爾特酒店

更多娛聞，喺晒《娛果》
http://fb.com/appledailyent