【又同馮紹峰拍拖出街】上海餐廳又被偶遇 趙麗穎肚凸凸疑似有孕3個月
馮紹峰趙麗穎
雖然趙麗穎工作室一路都係唔認拍拖同大肚,但時間可以証明一切
趙麗穎同馮紹峰拍拖都唔係乜嘢秘密,雖然佢兩個冇公開認拍拖,但佢兩個近幾個月經常不避嫌一齊坐飛機嚟香港玩,俾網民影到喺香港Shopping,日前返到上海,又俾人影到一齊約朋友去餐廳食飯,喺食飯期間,趙麗穎去洗手間時俾人影到佢肚凸凸,有網民估計應該不止3個月。
食食下,煙癮大嘅紹峰仲中途離座出外面食完煙先返入嚟坐,其實間餐廳有擺低煙灰缸俾佢,但佢都出去食煙,唔想俾女友吸二手煙,唔知係咪女友真係大咗肚嘅關係。
除咗喺餐廳俾人撞到外,日前趙麗穎同馮紹峰喺上海一間傢俬舖睇傢具又俾網民影到相,睇嚟佢哋真係喺度建立一個新愛巢。
傳聞話趙麗穎同馮紹峰年底就會去歐洲結婚,咁新婚梗係要有新房啦,所以依家放假,兩個人開始去搵屋同籌備婚禮都好正常,雖然趙麗穎工作室一路都係唔認拍拖同大肚,但時間可以証明一切,好快可以知道。
精選娛聞,喺晒《娛果》
http://fb.com/appledailyent