【咖喱牛腩】對症下藥有前景

蘋果日報 2017/07/13 04:00

英超阿仙奴拿卡錫迪咖喱牛腩鄧寇克大行動英國足球哥拉辛拿斯天地豪情

睇吓近期有咩電影上,就知道暑假嚟緊,好似新蜘蛛俠、壞蛋3等,當然最期刻係大導演基斯杜化路蘭新作《鄧寇克大行動》,喺小弟心目中,《雷霆救兵》係最正二戰電影,睇吓鄧寇克大行動有冇得挑戰佢嘅神級地位。電視台都有猛劇賀暑假,梗係唔係講緊王晶套所謂賭片,小弟唔小心睇過兩三集,除咗荷蘭叻做情聖溝港姐冠軍外,就係佢哋班所謂徒弟溝嚟溝去,都唔知同個賭字有咩關係。相反凌晨場剛剛開始播嘅《天地豪情》仲精彩,單係羅嘉良、黃日華、陳錦鴻,都夠晒好戲,仲有奸到出汁嘅張家輝,其實大台有冇考慮過放返天地豪情喺九點半重播呢?
進入職場,除咗教師,有暑假真係唔多,職業足球都叫做有,不過隨住球員薪金攀升,球會又要搵多啲外快,強隊唔係去亞洲就要去美國,參與季前表演賽搵吓錢,好似阿仙奴,今日已經喺澳洲友賽FC悉尼,之後又要去中國。
講起阿仙奴擴軍,暫時都仲對辦,或者其他球迷焦點係破球會轉會費紀錄嘅前鋒拿卡錫迪,小弟就更關注左翼衞哥拉辛拿斯。自從雲格上季尾改踢3-4-1-2陣式後,戰績有明顯改善,雖然拎唔到前四,都叫食尾糊贏英足盃。右翼衞無論用阿歷士張伯倫定比利連,問題都不大,但左邊就弱少少,蒙利爾對抗性唔夠高,基蘭基比斯就腳下功夫麻麻,成日助攻上前都誤傳。哥拉辛拿斯身材唔錯,之前踢史浩克04仲可以客串下中堅,打左翼鋒又夠晒助攻力,上季假假地都係德甲後衞組助攻王。而且只不過24歲,體力充裕,打晒成條左路都冇問題,有德甲背景,同梅菲達斯、奧斯爾等都啱咀型,阿仙奴似乎入啱貨。
文:牽牛