現年33歲「天氣女郎」黃婉曼（Icy），14年嫁俾會計師兼馬主馮柏基，做咗馬主夫人，今年初公佈造人成功，第一胎係女，預產期喺今年8月，距離生產仲有一個多月，Icy一直嘆慢板未買嬰兒用品，二十四孝老公日前趁放假，陪老婆到銅鑼灣狂掃嬰兒用品。

第一次做爹哋媽咪，明顯準爸爸馮柏基比較細心，掃貨前一早寫好購物list，可以對住手機照單執貨，不過佢錫老婆錫到燶，揀嬰兒用品時乜都畀Icy揸主意，又會細心睇下產品用料，一切都非常謹慎。呢次掃貨嘅第一步，就係要準備好「走佬袋」，Icy話都擔心囡囡會急不及待提早出嚟，有咗走佬袋到時就唔會措手不及。

執好走佬袋，Icy同老公下一步就要揀BB車，目標係輕便安全型，Icy話推BB車呢個任務會交俾老公多，所以揀BB車呢個工作就交咗俾準爸爸。佢哋邊行又邊睇貨架，好快就執滿成車嬰兒用品，馮柏基都好貼心，喺老婆訪問期間，佢就去排隊畀錢，分工合作，甚有默契，唔怪得Icy成日讚老公係「暖男」，馮柏基仲特登揀個寫上「PaPa The Best」奶嘴，準備送畀囡囡做見面禮。

懷胎8個月嘅Icy，肚子越嚟越大，但行動仍然自如，佢話：「我覺得時間飛快，日前去產檢話仲有一個月左右，我先意識到好快。」

準媽媽Icy一直冇停工安胎，既為港台開咪，又分身打理麵包學校，根本忙到唔記得預時間買嬰兒用品，Icy突然驚覺一個月後生得：「臨急抱佛腳，今日買咗走佬袋、奶樽同衫仔。」

「本來覺得陀BB要9個月好漫長，但突然好快過咗，好奇妙，我就快見到囡囡。」Icy唔算好動，但佢腹中磈肉就好活躍，佢話：「囡囡o依家踢得好緊要，波浪咁踢，可能同我一樣咁興奮，好快見到面。」Icy講時都一臉期待。

Icy仲話呢個月要同時間競賽，必要安頓好麵包學校未來幾個月生意計劃，佢擔心生完要坐月，湊BB會困身，所以未必可以放咁多時間巡視業務，到時要靠同事幫忙，所以佢o依家就要開始安排好一切，亦唔排除生完帶埋囡囡去返工。

場地：荷花親子中心

想隨時獲得更多親子資訊，快啲like Easy PaMa Facebook啦！
https://goo.gl/1qWM8g