自言拉票唔使去葵青嘅梁振英，原來月中去到天水圍尋「春」，喺元朗大劇院睇「天水圍的春天之我．家．社區慈善SHOW」。佢噚日喺自己個blog上話，過去幾年每年都出席呢個慈善籌款活動。
呢個騷嘅節目包括唱歌跳舞，仲有武術表演，上台嘅多數係區內居民，梁振英唔嫌隔涉入到去睇街坊登台，冧到一眾師奶眉開眼笑，開心到不得了。梁振英成為天水圍「師奶殺手」有相為證，有個女士十指緊扣梁振英合照（圖），仲好肉緊咁捉住佢手臂，箝到實一實。