日本男子偶像工場尊尼事務所近日可謂麻煩多多，殿堂組合SMAP早幾日傳出解散消息之後，連日嚟關於佢哋嘅傳聞滿天飛，有排煩。SMAP事件未平靜，今日另一隊人氣組合關8喺大阪巨蛋球場舉行巨蛋巡演最後一場，但成員大倉忠義因為患咗腸閉塞，缺席今日嘅演出。

曾經演出過日劇《三色貓探案》嘅大倉忠義，噚晚突然感到劇烈肚痛，但仲死頂做電台節目，但經過一晚之後，仍然感到烈痛，於是去咗睇醫生，被診斷患上咗腸閉塞。大倉原本想堅持演出，不過醫生勸告佢今日要休息，結果都係要缺席演唱會。大倉喺官方網誌話唔能夠演出巨蛋巡演最後一場好可惜，又對令粉絲失望而道歉。