六四32︱兩女之母攜幼訪紀念館：唔使旨意洗下一代腦
蘋果日報 2021/06/01 00:40
六四紀念館支聯會六四
今年維園被燭光填滿的場景不再，但禁止在維園亮起燭光，又是否能熄滅人心中、象徵着希望及未敢忘記的燭光？六四紀念館由昨日（30日）起重新開放，舉行名為「八九民運與香港」的主題展覽，亦首次設置場區，讓市民到場獻花。場館重開第二日，人流過百。即使六四或將成「禁語」，但仍有港人願意以自己的方式薪火相傳。
受疫情影響，館方鼓勵訪客使用網上預約以控制人流，但館內場面亦不見冷清。本報記者攝
望女兒認識真正歷史
有兩個年幼女兒的林小姐，六四時仍在就讀中學，帶同兩個女兒來到六四紀念館，她指是要讓她們認識真正的歷史：「等佢哋認識六四啦，認識究竟真係發生緊啲咩事，因為我唔想佢第時……佢哋都仲細個啦，第時嘅教育肯定係歪曲晒」。她會在今年六四，帶着兩位小朋友，身穿黑衣到樓下靜坐，並會以手機亮燈或不燃點的蠟燭悼念，亦鼓勵其他港人「Be water」。
作為一名母親，她尤其關注教育的議題，留意到政權頻頻試圖竄改歷史，她指：「其實好想講嘅係話，（政權）咪使旨意你可以完全洗晒佢哋腦，但我呢代，起碼我自己，我一定會畀番佢哋知個真相，等佢知發生過咩事」，她指女兒未來怎樣想她無從干預及猜測，但若然想透過竄改歷史來磨滅真正的歷史，洗下一代腦，她堅定地說「唔使旨意」，指將堅持身教，不會讓極權得逞。
89年出生的張先生深信，以香港人的精神，總會有方法度過被打壓的日子。本報記者攝
89年生港人：當年咩事大家心知肚明
89年出生的張先生，笑言自己本來對六四沒有太大關連：「本身就冇乜聯繫嘅，除咗我喺八九年出世以外」，當時沒有經歷過六四，但長大後慢慢了解到當年的歷史，「（其實）成件事到底係咩事，大家都心知肚明，依啲大陸嘅謊言，都係一個心知肚明」。
近日頻頻有曾經參與六四集會的建制派及高官，稱六四集會「不合法」或黑臉，他指「冇計嘅，佢依啲所謂要低頭嘅人，咪繼續低頭囉」。被問及今年的六四將如何過，他則表示仍在觀望中，「一個人嘅限聚令都得嘅，一個人非法集結都得啦，但我估香港人總有自己嘅方式去做到一個合法表達自己嘅情況，最多大不了，大家係屋企度過依一年、或者呢幾年囉。大陸本身每個關於六四嘅人，喺大陸佢都用自己嘅方式度過緊」，指「總有自己嘅方式嘅，大家加油啦」。
政府以限聚令及疫苗接種率為由，拒絕支聯會六四集會的申請，他指「政府唔止打壓緊燭光添，仲打壓緊全部嘅香港人添」，但寄語港人加油，「以前成日都講啦，香港人最叻係應變同埋團結呀嘛，咁我估依個精神到依家都適用嘅，應變依樣嘢，香港一幾年嗰陣，即係經歷咗好多依啲咁嘅情況，到而家我唔夠膽講叫齊齊整整啦，但係都捱到嘅時候，就繼續啦。」
作為末代有「真歷史」讀的黃同學，他寄語下一代學生多循不同途徑吸收資訊。本報記者攝
中學生：勿齋吸收學校畀嘅知識
中學生黃同學，修讀歷史及中國歷史的文科，是因為想要學習「真正的歷史同真相」，來到六四紀念館，想要了解中國近代的民主發展。「（每一個極權）都係想做對自己有利嘅歷史，畀世人睇到，但係其實好多（真實發生過嘅）嘢都會畀大眾睇到」，他指有很多不同的渠道可以了解到真正的歷史。作為末代有「真歷史」讀的學生，他寄語下一代學生多循不同途徑吸收資訊，「讀多啲書囉，吸收多啲知識，唔好齋吸收學校畀你嘅知識，因為學校已經係一個逐漸畀人染化嘅地方，要自己再睇多啲新聞，同埋多啲資訊，要保留一個獨立思考、自主批判嘅能力」。
他在六四紀念館中細閱《北京風波真相》一書，指對於六四有更深入的了解，如中國就六四的官方說法，如何與其他外國記者及圖片有出入，指中國的官方說法，對六四當天凌晨至早上的清場行動隻字不提，時間線直接從凌晨跳至早晨。中共以「暴徒」、「暴民 」稱呼當年參與八九民運的學生，他指「睇得出呢個政權其實唔中立」。
他又形容，中共指六四只是死了二百多人，與事實有很大出入，與警方稱七二一為「元朗及西鐵站附近持不同派別意見的人士的對峙及聚集，演變成為的暴力衝突事件」同出一轍，指在政權試圖扭曲歷史時，更要有獨立的思考，希望大家不要因為惰性而被政權洗腦成功。
Mary身穿印有反送中運動口號的T恤參觀六四紀念館。本報記者攝
市民穿「光時」Tee參觀
每次談及成為政權眼中釘的六四，有不少人總會有所顧忌，選擇不出鏡；身穿「光復香港 時代革命」字句的T-shirt、身上有不少文宣產品的Mary卻仍未懼置身鏡頭前：「我唔會有何擔心嘅問題或擔心之處，我哋唔可以再畀政府操控住我哋公民抗命嘅力量。」指自己不會去想任何的後果，絕不會讓恐懼有任何嚇怕自己的機會。
Mary形容，六四是爭取和平（民主）的公民抗命，指當年的鎮壓「中國真係做錯咗」。中共政權多年試圖掩蓋及竄改六四的一段歷史，「我覺得其實無論佢哋點去竄改，都改變唔到歷史個真相。北京或者中國做每一樣嘢，咁啲（中國）學生都係親眼見到呢件事，係有呢個歷史記載。我覺得無論佢哋點樣竄改，都只不過係俾一個藉口佢哋講大話，冇乜意思㗎其實。」
港府試圖以不同的言辭修飾七二一、八三一等歷史，Mary則指「冇一個香港人會信政府講嘅呢啲謊言」。
維園集會再被禁，場館首次設置區域供市民獻花。本報記者攝
Mary期望透過身上的文宣，提醒自己及大家要堅持：「因為喺疫情底下，我自己覺得，唔多唔少嘅香港人或手足，都可能會忘記咗呢個反送中或者爭取民主嘅理念。我個口罩、件衫同個袋，都係要提醒，就算個疫情完結、或者仲喺度都好啦，希望佢哋都仍然會記住呢件事，唔好放棄。」
疫情之下，社會運動陷入沉寂，Mary說：「如果你哋肯堅持落去，呢個願望係始終會實行到嘅」，自己將會在六四當天自備鮮花獻給死難者，指「念念不忘，必有迴響」。
館內職員指，今日館內有過百人流，有不少人帶同白花來到，在獻花區獻花悼念，她同時透露，近兩天留意到有較多年輕人到訪，亦有不少父母帶同小朋友來到。
館方展出歷年維園六四晚會的相片。本報記者攝
-----------------------------