英影迷選靚鼻 有乜標準?
奧蘭多鷹鼻勾魂撼扁碧咸

蘋果日報 2004/02/14 00:00


英國連鎖超級市場Waitrose,最近搞咗個靚鼻名人選舉,結果金像影后荷爾芭莉(HalleBerry)同埋《魔戒》型男奧蘭多布魯(OrlandoBloom),雙雙被影迷選為擁有最靚鼻形嘅男女明星,不過呢個選舉有乜準則呢?我羅拉都答唔到。
憑《魔戒》系列電影竄紅的奧蘭多今次就威盡,佢嘅古代扮相好受歡迎,連帶佢個微勾嘅鷹鼻都撼贏性感型男畢彼特(BradPitt)同碧咸(DavidBeckham),令人意外。

豬膽鼻撼贏高鼻
至於女星方面,荷爾芭莉出咗名係靚女,雖然佢個豬膽鼻形點都唔係最標青嗰個,但居然擊敗排名二同三嘅KylieMinogue、妮歌潔曼(NicoleKidman)呢兩個有傳統高鼻嘅靚女。就連做調查間公司嘅發言人都話:「我哋真係唔知點解啲fans會揀呢啲名人!」
另外,奧蘭多參演嘅《魔戒3》喺啱啱公布嘅Satum頒獎禮提名,獲得最佳魔幻電影等十三項提名。