杜汶澤噚日專程由日本返香港，以代言人身份喺旺角出席MotorolaV360電話宣傳活動，佢重喺平面廣告度以肌肉型男嘅造型亮相，但現實中嘅佢就肥咗好多，杜汶澤笑話：「咁大家就知啲減肥廣告有幾咁真啦！」原來阿澤喺日本拍《情義兩心知》時狂食，肥咗成十磅。

怕俾老婆鬧

周杰倫拍完《頭文字D》，買咗兩架AE86，原來杜汶澤前日喺日本亦都買咗架AE86，價錢大約七萬幾港紙，佢話：「劉偉強之前都買咗架AE86，但俾周杰倫撞咗，我重未同阿田（老婆田蕊妮）講買車㗎，佢知道實話『你買波鞋就好啦，買乜鬼車呀。』」
有雜誌指黎明喺日本拍《情》片嗰陣住五星級酒店，杜汶澤只係住三星，阿澤話：「咁係正常嘅，佢喺香港住嘅屋比我喺香港嘅屋貴好多，咁去到日本佢住嘅酒店比我貴，又有幾咁奇？」
而阿澤嘅老婆田蕊妮前晚喺鑽石山綵排《白蛇青蛇》，重首次以白蛇嘅造型亮相，不過睇嚟就似蜘蛛多啲。田蕊妮話：「本來以為白蛇會好清雅，點知件衫係黑色嘅，啲朋友話我似蜘蛛精同蝙蝠。」馮仁昭都覺得佢嘅造型有啲古怪。