河國榮一連兩場喺九展舉行嘅《31。31 dare to dream 河國榮音樂會》，噚晚喺九展順利完成，依然獲得唔少觀眾捧場，嘉賓方面除咗頭場嘅古巨基外，今晚繼續有J.arie現身支持，台上河國榮公開多謝太太為佢今次演唱會出心出力，並邀請太太Bonnie上台同觀眾見面。觀眾不斷叫河國榮即場咀太太，但兩人淨係搭住膊頭，笑笑口同大家打招呼，演唱會去到晚上十一點完結，期間觀眾反應熱烈要兩度Encore。

河國榮接受訪問時話自己好滿意兩場演出，尤其要多謝太太：「佢幫咗我好多，係Admin同埋安排上有好多嘢做，佢忙到七彩，冇佢呢個騷搞唔成。」仲話完騷後可以休息幾日，下星期同太太出去睇戲慰勞吓佢。同時河國榮又特別多謝古巨基同J.arie拔刀相助：「基仔頭場時特登嚟幫手，佢好支持我、對我好好，佢喺台上唱歌嘅時候，我開心到一路望住佢一路笑。」

河國榮透露今次兩場演唱會，係佢同太太自資50萬投資，問到預計今次可唔可以回本？佢話：「回本就一定唔得㗎啦，不過我哋做得好開心，就算蝕錢都笑住蝕。」

相關報道：
【自資開騷完夢】當年澳洲棄醫來港發展 河國榮：嗰陣得五千蚊同個篋
https://bit.ly/2xCbmEu

【感激太太支持】戥河國榮開騷感動 古巨基：佢嘅電視劇陪住我長大
https://bit.ly/2Hcc9f0

精選娛聞，喺晒《娛果》 http://fb.com/appledailyent