2016年，由一幕幕令人躁動不安嘅畫面開始！先係股市於首交易日開「黑門」，A股成功測試「熔斷機制」；緊接而來係人幣暴跌、油價再創11年半新低；樓價、本地零售、內地經濟，壞消息接踵而至。

再加上李波等人被綁架後，反被屈北上叫雞，無恥之輩的下流言論，令唔少人怒火爆發！經濟、股市唔好，加上不斷累積嘅不滿情緒，今年注定係紛擾亂局嘅一年。

內地經濟低迷，最慘係人仔跌跌不休，身家縮水，情況持續下去，會唔會「支爆」我唔敢講，但香港股市，以至經濟出現下行周期嘅機會唔細。所以於未見利好因素前，低風險資產比例要提高，買股勿太進取。

今推介兩隻股，較穩陣嘅有維珍妮（2199），公司最重要嘅係有專利技術，仲將技術由原來造Bra擴展到跑鞋，成功吸大客UnderArmour，證明管理層有料到。另外，公司越南新廠房有望首季投產，提升產能。前景好之餘，呢幾日跌市，股價仍守得住喺11蚊左右，同你報平安。當大市好轉，相信會有更多錢流入呢類實業優質股。

如果你偏好細價股，可諗諗中國信息科技（8178），早前公佈夥拍三井物產及大日本印刷旗下NihonUnisys，將日本各地的生活用品及高科技產品，打入廣州市場。如果合作成功，未來更會複製去其他城市。另外，12月以0.13元批股後曾炒上去，股份涉32%股權。近來股價冇錯再打回原形，但咁多動作，似係部署易主，可小注博博。

掌握財經生活資訊，即Like「蘋果ATM」fb專頁啦！
http://fb.com/appledailyatm