蔡卓妍（阿Sa）第一次叫老闆楊受成開戲，揼本投資拍攝電影《原諒他77次》，上映至今6日，每日票房過100萬，噚日已經有逾590萬票房，成為華語片嘅冠軍，單日票房就屈居亞軍，輸畀由湯告魯斯主演嘅《盜墓迷城（2017）》，成績認真唔錯。

噚晚阿Sa同衛詩雅去咗荃灣嘅戲院謝票，今朝阿Sa就好頻樸咁飛去北京錄節目，佢收到呢個票房好消息，接受《蘋果》電話訪問表示：「好開心呀，嚟緊我哋會有慶功宴，會唔會買禮物畀自己？其實我只係收演員片酬，票房好我係冇錢收，哈哈。大家鍾意呢部戲已經係最大禮物，因為壓力有少少大，自己第一次打電話畀老闆叫投資，唔衰得嘛，套戲唔蝕呢，已經好開心。」

問到有冇信心破自己《雛妓》1,700萬票房紀錄？阿Sa笑笑話：「最好可以過千萬啦，暑假檔期好多西片上，通常都係西片天下，港產片有咁成績已經好開心，有交代啦，又賣咗片去馬來西亞同大陸。」有冇信心再問鼎影后？佢坦言：「呢套唔係《雛妓》嗰類戲，上映後都有睇網上評論，都幾兩極，女仔覺得有共鳴，但有啲人就覺得女主角好煩，大大小小都嘈一餐，我都覺得自己喺戲係反面教材。」

兩部電影都係邱禮濤導演，阿Sa話：「仲有編劇李敏，我哋係鐵三角，之後再拍導演嘅《常在你左右》，煞科宴老闆攞錢抽獎，我同導演都話冇抽獎命，點知我上去抽最大嘅幾萬蚊現金獎，竟然抽到導演，嗰晚我都抽到家棟哥嘅五千蚊，我哋幾旺大家，哈哈。」