新海誠炮製嘅動畫電影《你的名字。》在港、日兩地都大收旺場，今年再有新片《煙花，應該和誰看》成為另一話題動畫。呢套動畫電影改編自日本名導岩井俊二嘅舊作《煙花》，由導演大根仁負責編劇、《魔法少女小圓》嘅新房昭之執導，故事發生在海邊小鎮，男主角典道暗戀同班女神及川薺，跟同時暗戀薺嘅祐介分屬老友，三人在校內比賽游水，薺決定趁煙花大會當日跟勝出一個遠走高飛，過程既浪漫又夢幻。

《煙花，應該和誰看》同《你的名字。》有不少共通點，以同樣方程式針對年輕一群捧場，《煙花》就起用人氣偶像廣瀨鈴、菅田將暉聲演男女主角，仲有聲優王子宮野真守、著名女星松隆子獻聲助陣，加上又在悅目畫面之間穿插多首好歌，仲記得RADWIMPS為《你的名字。》來得錦上添花，《煙花》嘅大熱主題曲《打上花火》由女歌手DAOKO唱出，唔止一度登上收費歌曲榜冠軍，YouTube播放率至今更衝破3800萬！至於年僅19歲紅人廣瀨鈴除聲演女主角，佢更為電影大展歌喉，翻唱松田聖子名曲《瑠璃色的地球》，歌曲收錄於原聲大碟之內，廣瀨鈴好謙虛話對自己歌藝毫無信心，但佢嘅歌聲卻為電影帶來驚喜。