當年今日
關於我們

唱世盃國語版主題曲露一手
黎明炫耀踢波兩度撻Q

蘋果日報 2002/01/02 00:00


黎明前晚尾場個唱,在新年倒數完畢後,其唱片公司高層上台宣布Leon代表中港台唱世界盃主題曲,之後Leon開心將足球踢到觀眾席送給歌迷,但竟兩度甩腳無法將波踢給觀眾。
黎明前晚在紅館完成十二場個唱的最後一場,為配合倒數進入2002年,個唱延至九時半才開始,快到午夜十二時前,Leon穿着新衣出場倒數迎新年,現場放煙花紙絮,氣氛熱烈,可惜Leon踏入新一年即遇到尷尬事。

在足球上簽名
話說倒數完畢後,其所屬Sony唱片亞太區總裁Richard及香港區董事總經理馮健強上台宣布,Sony成為2002年世界盃的指定品牌,而Leon則代表中、港、台唱大會主題曲,並會找雷頌德作曲,其所唱的國語版本將與其他各國歌手的主題曲,一同收錄於四月推出的世界盃主題曲大碟之中,現場即席有人拿幾個足球上台讓Leon簽名,Leon興奮地簽名後,欲將波踢到觀眾席送給歌迷。
細個踢波好叻
誰知Leon大腳一踢,竟然甩腳,全場萬多名觀眾看着Leon所踢足球飛向台側,場面十分尷尬。Leon只好拾回足球再踢一次,但他只能將波踢落台邊,到第三次他才成功將波踢給觀眾。
Leon在慶功宴上說:「個波都幾西,我踢第一個時明明係正面,都西咗去側邊。我細個時好叻做後衞,因為我肯磨薑擋波,踢就唔叻,𠵱家都係做好歌手本分,踢波留畀啲真正高手踢,我做啦啦隊打氣算啦,踢波都唔係我嗰家。」

巨型海報塌下
前晚Leon除踢波甩腳外,到慶功宴時一張他的巨型海報忽然塌下,正好打在高層Richard的頭上,台上眾人愕然並面露尷尬之色,Leon隨即說:「張海報係紅色嘅Leon,Leon令唱片公司老闆鴻運當頭。」前晚黎明父親及張可頤都有到紅館捧場。
另外,提到早前Leon緋聞女友舒淇到紅館捧場被Leon歌迷以粗言辱罵,Leon說:「唔好同我喺新年講呢啲嘢,我幫唔到你乜嘢。」
採訪:蔡如玉、梁詠怡
攝影:何國豪