熊黛林(Lynn)同郭可盈嘅細佬郭可頌喺14年撻着，拍拖兩年，已好有計劃視對方為另一半。郭可頌雖然離過婚，不過佢屋企有百幾億家底，加上好錫Lynn，更火速光明正大將女友融入郭家家中，郭媽媽、郭可盈都好鍾意Lynn，故佢哋兩個已經有晒結婚計劃。

郭可頌年初已同Lynn求婚成功，更送上過百萬、3卡求婚鑽戒，之前兩個齊以1980萬買咗北角半山全海景豪宅，又影到佢哋齊齊買家電，擺到明為結婚急急準備。之前有傳佢哋會喺10月註冊兼擺酒，不過女方就忙喺內地拍真人騷，婚期要順延。

昨日就有報道指Lynn婚期已訂喺12月，雖然Lynn就喺內地忙緊拍劇真人騷等工作，郭可頌就四出睇樓，其中去咗西半山干德道39號天匯，睇咗一個索價成一億嘅2000呎單位，而佢又知Lynn鍾意睇海景，佢就睇中一個中層全海景嘅單位，更指會係佢哋婚後愛巢。郭可頌接受訪問時亦承認忙緊搞婚事，原本佢哋之前買入北角半山嘅單位會用嚟投資之用，指佢哋會搵新地方住。另一邊，作為準姑奶嘅郭可盈近排孖住老公林文龍，去咗睇另一個半山豪宅嘉珀山，被指佢幫細佬睇樓。

即係Lynn未過門做郭太，郭家上下都着手籌備婚事，更「重金」先行，之前已收過百萬求婚戒、2000萬北角豪宅同70萬嘅Porsche名車揸手，嚟緊結婚愛巢又近億元，已有成億元「厚禮」等緊佢做百億新抱。本報今日就搵過Lynn，佢就未有回覆，見佢微博就po咗噚日同古天樂喺上海出活動嘅相，而佢經理人Kim就短訊表示：「Lynn 最近忙拍戲，先專心工作，有開心事一定話好快話俾大家知，嗰本雜誌未有時間睇，不實的報導就不回應啦。」