元宵將至，兩條麻甩佬喺網上眉來眼去︰馬雲先搭上廣東保險佬，珠胎暗結嘅「定期寶」勢於元宵節橫空出世，對手馬化騰不甘示弱，傳出早已搞上基金佬，結晶「定投寶」亦要喺元宵節呱呱落地。水深火熱之際，遠在華爾街嘅老外大叫一聲︰「央媽殺到！」呢套互聯網爭風呷醋劇，是為《雷「乳」》。
阿里巴巴嘅定期寶，根據內地媒體報道，運作模式係將資金投放於萬能險，再投資到房地產市場，與一般基金相若；而騰訊的定投寶，則與其自家開發嘅A股指數掛鈎，係內地首隻互聯網權益類基金產品，暫未知道市場反應，但計創意，騰訊略勝一籌。

防網上金融風險增

踏入馬年，雙馬喺互聯網金融嘅拼鬥亦轉入直路。作為普通馬迷，當然可以剝花生睇戲或者畀錢入飛玩埋一份。但昨日《華爾街日報》就引述消息指，央行正牽頭制訂監管規定，防範快速發展嘅互聯網金融日漸增加嘅風險，所謂風險，係「客戶資訊被盜用」同「非法融資」。
上述所謂嘅「風險」，係自有網上金融產品以來已經存在，但央媽竟然喺噚日先好似發現新大陸一樣重視，市場人士無不嘖嘖稱奇。有內地基金佬爆料話，原來兩馬喺市場吸水飽到嘔之際，「水緊」嘅內地銀行唇乾口淡，唔叫就有鬼，正所謂「會叫的孩子有奶吃」，央媽畀唔到奶，都要作吓勢趕下馬。如果真係要出手，嗰啲乜乜寶，未成形已胎死腹中，駛乜大月份引產，你估央媽係計生委？

記者：李以莊
本欄逢周二至周五刊出