王君馨噚日出席美妝品活動，一襲黑色圓領迷你裙，極盡性感，sexy cutting入膊、高衩，不過最驚為天人嘅，要數到胸前開出一道斧頭形三角cutout，酥胸半露更橫誇左右。

其實呢條裙已經係兩年前嘅過季款，來自意國名牌Versace出品，屬2015年秋冬款。當年品牌季度大玩不對稱式性感，如長短不一、半身透視半身暗黑，以及大刀闊斧式sharp cutout，都相當挑戰穿著者嘅身材。

過季裙？當然無問題啦，但王君馨着出嚟就有少少「時裝車禍」feel，雙胸喺一層薄紗下面有啲擠壓……呢次視覺上出事，問題可能出自王君馨身上，因為佢34D上圍太豐滿，令條裙睇落偏向暴露，減低咗時尚感；而佢為怕走光唔敢大動作，亦失卻Versace woman應有嘅自信性感。

咁Versace出品有冇代表係着得好出色嘅呢？答案係：有嘅。上年金獎像，文詠珊（JM）就係着住Versace真空晚裝艷壓紅地毯。名模Irina Shayk於2015年都着過Atelier Versace，性感誘惑度同樣爆燈。