仲有兩日就係期指結算，昨日個市比預期中平靜，可能係因為前晚花旗嗰邊喺低位抽番上嚟，投資者都係睇清楚先，至於期指大戶，好淡兩面都唔見有大動作。
恒指收市唔見咗59點，相比起近日嘅反彈幅度算係濕濕碎，不過，升勢窒咗，今日嘅走勢就有特別嘅意義，恒指如果推上去，即係話昨日嘅下跌已經算係完成咗短線調整，恒指較有機會試下50日線先番轉頭，相反，如果港股今日下跌低收，咁就可能係反彈浪完成，結算之後個市又要睇番淡啲。
個市靜得咁緊要，炒家走晒去炒有概念又活躍啲嘅股仔同窩輪，不過，上升正股唔夠330隻，下跌正股超過520隻，形勢上都係淡啲，短炒盤大都係有水位就獲利。
伊朗嗰邊嘅局勢有變數，油市、金市同滙市都有人大做文章，油價短期有機會上試66美元，金價隨時試680美元，港股呢邊相關嘅股份可以吼吓，相關C輪如果數據合理嘅話，可以博吓。

平保C輪7523昨日升5.6%，收37.5仙，正股（2318）升1.2%，收37.75元，走勢再靚啲，如果正股破38元收市，隻輪可以放心揸耐啲。
中電信C輪4629：中電信（728）昨日收3.85元，升差唔多5巴仙，相當矚目，技術上出現重要突破，成交大增，睇嚟破4元關冇難度，應該可以試吓1月初高位4.47元，可以買啲中電信C輪4629，昨日收47仙，槓桿率8.2倍（有效5.7倍），對沖值0.74，正股升上4元同4.47元，4629應該唔會低過58仙同1元，正股跌穿3.68元止蝕。