受美國退市拖累，新興市場尤其南韓表現受壓，行運十年嘅渣打（2888），亦難逃大勢逆轉嘅衝擊，舊年底結算前業務滙報發出盈警，股價隨後大瀉，今年頭又宣佈高層重組，精簡架構。要打逆境波，正所謂輸人唔輸陣，執靚形象亦係企業求變嘅生存之道。
渣打噚日就宣佈，將原有「品牌」同「市場拓展」兩個部門合併，開設「集團品牌及市場拓展主管」呢個新位，並由渣打南亞地區首席市場拓展總監Sanjeeb Chaudhuri，由今年4月1日起擔大旗。渣打發言人補充，合併品牌同市場拓展部門，可以令集團整體發展更統一，有效加強產品發展同前線銷售。

傳滙控曾聘外援保形象

Chaudhuri喺零售銀行有唔少實戰經驗，加入渣打前，喺花旗零售銀行任要職，亦喺醫護、飲食等不同行業做過市場拓展，近年主力幫渣打數碼化發展。此君一次過由地區總監連跳多級，榮升至集團部門主管，相信渣打對佢寄予厚望。
遇上逆境要執靚形象嘅唔止渣打，曾飽受美國次按連累嘅滙控（005），2007年2月曾發出世紀盈警，當時滙控被投資者狂沽；英國報章就傳聞，集團考慮外聘財經公關顧問，省靚招牌，力挽狂瀾。
當年英國《觀察報》引述消息話，時任滙控主席葛霖有意搵Maitland同Financial Dynamics幫手，多啲就集團策略向外界解話減低誤解，但滙控從無正式回應請外援公關嘅傳聞。

李華華
mailto:[email protected]