苟姑娘苟芸慧噚日喺電視城「啷」住一滴點都唔肯掉下來的眼淚，現身解畫話自己唔係「富黛戀」嘅小三。城城同一晚出席電影《同謀》慶功，笑容滿臉，知道苟姑娘喊，仲話﹕「吓？咁慘呀﹗唔使喊，清者自清。」不忘加多句﹕「不過我同佢唔熟。」

好喇，呢後「富黛戀」三岔口之中，兩位主角噚晚已現身，今日就輪到發放消息嘅熊黛林出現。佢去咗中環出席一內衣店活動，黑色貼身seethough上陣，急不及待開工撲水。當然，最令人注目，係佢尾指上嘅「重新出發」嘅分手戒指。現場有半百記者，等問熊女心情。

熊：熊黛林　　記：記者

記：心情如何？
熊： OK呀

記：個樣好憔悴喎？
熊： 可能今日太早瞓。

記：係咪以淚洗面？
熊： 邊個講0架！（係咪喊過嚟所以眼腫？）OK，冇呀，我噚晚冇喊過。

記：前晚呢？（於微博貼圖宣告分手當晚）
熊： （苦笑）OK嘅。

記：係咪同城城分手？
熊： 有啲嘢過咗去，依家係新開始。

記：有報道話你哋係4月5號(清明節翌日)分手？
熊： 我唔知啲報道喺邊度嚟。

記：依家係單身？
熊： 係呀！過咗去唔想再講，依家係新開始，我好開心 。 (假笑)

記：有冇覺得可惜？
熊： 其實我嚟香港七年，日日好開心，冇乜可唔可惜囉，望以後更加開心。