西九文化區苗圃公園前日舉行電子音樂節「Ultra Music Festival」，有4人昏迷送院，其中一人死亡，警方在現場發現毒品；電音節除吸引大批20至30多歲的觀眾捧場，本報在現場亦發現不少藝人，喜愛夜蒲的連詩雅於下午4時許已現身，孖王宗堯舊愛黎紀君齊齊去蒲，着熱褲騷長腿的Shiga一副戰鬥格，可惜冇仔埋身，遇到幾個女性朋友就玩自拍，幾乎全程都是與黎紀君咬耳仔，有時就玩手機，似乎悶悶不樂。直至晚上7時許，最紅的DJ Hardwell出場，Shiga終於開始high，投入跳足半粒鐘。

除了Shiga，人妻周家蔚亦撇甩老公洪天明和兩子，跟好姊妹梁靖琪等男女友人捧場，兩人邊飲啤酒邊聽音樂，露背性感上陣的Toby更滿場飛，周家蔚就不停影相玩電話，還咬着啤酒膠杯撳手機，DJ Hardwell出場時眾人high爆跳舞，可能在公眾場所關係，兩人都蒲得好有自制能力，一杯啤酒飲到尾。而莊思敏就在VIP區現身，有梳化有包廂有香檳，雖然有7、8位朋友，但莊思敏卻跳孤獨舞，身旁男友人沒陪她盡興，難得莊思敏全程扭腰，跳到悶就攞手機影相。
Shiga昨到觀塘出席ViuTV真人騷《Baby Rider》拍攝活動，被問到前日去西九電音節，她表示自己天黑就走了，因為天氣太熱。至於發生1死3命危慘劇，警方在場撿獲小量毒品，正調查是否有人濫藥。Shiga昨說：「我冇留意入面有冇人吸毒，不過場內有賣酒，我以為飲醉，大家聽到啲音樂都好興奮。我都有朋友暈咗，係因為太熱又焗，休息咗陣都冇事。」

身為兩子之母的周家蔚昨亦感慨說：「聽到咁嘅新聞都好心痛，以前去懲教署監獄見到啲小妹妹，未夠16歲，講番自己點解食毒品，連失禁都繼續食，大家一齊着尿片，其實佢哋都唔識得分別乜係好乜係壞，見到朋友做，自己就跟住做。」她覺得年輕人吸毒，家長亦有責任：「希望家長好好留意自己嘅小朋友，而最差係賣毒品畀佢哋嗰啲人，淨係為咗賺錢，唔會理一條寶貴生命。」
Toby前晚玩到9時許離去，對於現場有人死亡，她感愕然：「我又唔覺有啲人特別high，其實嗰度都幾焗，好多男仔都除晒上衫，我都一路飲好多水，反而少飲酒。」