民政事務局前局長藍鴻震（藍爺）退休接近十五年，今年都七十四歲，最近忽然出山，擔任創業板上市公司奧栢中國（8148）聯席主席。奧栢新近計劃做互聯網金融，藍爺講明自己唔係科技專家，做主席最緊要係識用人。咁即係「Everything（is）under control」喇！
藍爺千禧年七月退休，臨退休前，佢向立法會提交《建築物管理修訂條例》法案，箍票不力被否決，再喺議員挑釁下，大叫「Everything（is）under control」，成為佢個人金句。

昨見記者聲如洪鐘

佢退休接近十五年，一直只擔任「超人」李嘉誠旗下長建（1038）、和電香港（215）同「賭王」何鴻燊旗下澳博（880）獨董，間唔中開會；今次忽然認真做奧栢聯席主席，仲簽約三年，每年獲酬金六十萬元，似乎真係退而不休，想再創一番事業。
公司股東兼聯席主席溫家瓏噚日仲專誠喺深圳舉行簽約儀式，藍爺喺現場十分風騷，有問必答，聲如洪鐘，仲擺晒甫士任影唔嬲。
不過，藍爺以前做開高官，做獨董都揀大公司，今次點會揀一間市值唔夠五億嘅創業板公司呢？藍爺就話，合作呢回事，最緊要係理念夾，主板同創業板學到唔同嘅嘢，佢亦希望從年輕、有衝勁嘅管理層身上學嘢。
藍爺確係有好多嘢要學，奧栢新近計劃進軍互聯網金融業務，藍爺自嘲唔係科技專家，最多係人生專家，笑住話「做主席樣樣都識，就係樣樣都唔識」，最重要識得知人善任，總之佢就搞得掂喇。

自言慳家　等Yen跌始遊日

藍鴻震（藍爺）一九九一至九七年間，任香港駐日首席經貿代表，與時任經濟企劃廳長官、後來做過首相嘅麻生太郎、以及美國前總統克林頓都交過手，話佢係日本通實不為過。
近日日圓滙價下跌，估唔到藍爺亦十分關注，噚日一提到日本，佢就好興奮咁話，「𠵱家Yen（日圓）跌咗咁多」，好希望遊日探朋友。問佢使乜等日圓跌先至飛日本，藍爺竟然仲扯大喉嚨咁話：「梗係要啦！」佢隨即自爆，噚日早餐都係幫襯平民快餐大家樂（341），證明自己一向知慳識儉，唔一定食得豪、使得多。

李華華
mailto:[email protected]