今個7月有唔少韓星輪住襲港，打頭陣嘅就係模特兒出身、有份主演韓劇《奶酪陷阱》嘅25歲女星李聖經。雖然佢正忙緊拍攝新劇《Doctors》，但依然抽空出席其代言嘅化妝品牌喺香港嘅活動。而李聖經難得訪港，又撞上今日係公眾假期，吸引大批粉絲到場追星。粉絲為見李聖經一面，企上梯同櫈，都幾危險!

大約1點44分李聖經終於現身，李聖經身穿黑色花花連身短裙、露腿現身，一出場就立即引起粉絲尖叫，粉絲不停用韓文大叫：「姐姐。」李聖經先用廣東話向現場嘅人打招呼：「大家好，我係李聖經」，其後粉絲就用韓文講「你好」回應。

而今次係李聖經首次訪港，被問到覺得香港點，佢就話：「覺得香港好好，但可惜今次嘅行程好短，希望下次可以留耐啲。」佢又話好開心可以成為品牌嘅代言人，可以宣揚韓國嘅化妝文化，亦好多謝粉絲對品牌嘅喜愛。其間李聖經又對住粉絲畀心心，又不停揮手同微笑，相當友善。

之後李聖經就試用品牌嘅化妝app，示範今季嘅流行妝容。其後佢又提到自己喺新劇嘅角色唔討好，好多人唔鍾意佢，所以就要憑靚靚嘅妝容吸引返啲人。

然後李聖經送出3個唇印畀粉絲做禮物，粉絲當然好想要，不過當佢行前送唇印時就引起一陣小騷動，有粉絲爭搶而係混亂中跌倒，而李聖經見到咁嘅情況似乎都有少少嚇親，不過好彩現場無人受傷。最後由於現場情況混亂，取消咗傳媒嘅訪問環節。