【就快跌至單位數】宋承憲出場都唔掂 愛姐新劇收視繼續跌
收視宋承憲李英愛金科長
由李英愛同宋承憲主演嘅韓劇《師任堂,光的日記》上月首播以來,收視一直係咁跌,由首播嘅15.6%,跌至噚晚播出第五集只得10.7%收視。
愛姐事隔十多年再復出拍劇,雷聲大雨點小,頭四集因為唔少網民批評劇情集中喺愛姐同宋承憲嘅少年時期戲份身上,宋承憲更鮮有出鏡,日前劇組已急急補鑊,除了喺噚晚播出第五集前先推出特輯外,噚晚一集亦重新剪輯,而呢一集宋承憲亦正式亮相,喺古代同愛姐仲有唔少對手戲,不過即使出動埋宋承憲出場,對收視都於事無補,噚晚一集收視比上周跌咗1.6%,以10.7%排喺同檔第二位,同時亦係《師任堂》開播以來收視新低,唔少網民都擔心《師任堂》有機會跌至單位數。
至於收視集集升、由南宮民、南相美主演嘅《金科長》,收視就比上周升咗1.7%,仲錄得15.5%收視新高,繼續穩坐同檔第一名。而《Missing9》收視就毫無起色,以3.8%包尾墊底。