中國信達（1359）比起上市價升得25%咁大把，而場內嘅祖國券商股，經呢一轉放紙鳶，股價比上市價，已經翻咗超過一番，全部上到雙位數嘅PE。在中港超級牛大前提無變底下，信達仲喺單位數嘅PE，超殘超抵搞。
信達係祖國四大不良資產管理龍頭之一，兼主打金融證券同資產管理業，係架勢堂級數。而喺呢一潮超級牛，信達現價（4.50元）比起2013年12月上市價3.58元，升得25%、半年都係升咗35%。而場內嘅內地券商股中信證券（6030），比起2010年上市價已升咗152%、海通證券（6837）升120%，銀河證券（6881）119%，兼全部創晒新高。

咁樣睇，唔計不良資產呢一瓣，信達到上年尾，揸住投資管理同金融服務兩瓣項目嘅淨資產，亦已高達534億元人仔，相當於每股1.84港元，係現價嘅40%，比重唔嘢少。而場內專業評估，信達去到明年嘅NAV增值26%，係繼銀河證券後，增值最多嘅股份。
食正呢潮超級牛同阿爺金融寬鬆政策底下，信達與其他券商一樣，係享受緊肥仔嘅booming，但股價係超級大落後嗰隻！
又場內專業評估信達明年PB，得1.1倍，今、明兩年EPS 0.53元同0.64元，兩年預測PE得8.3倍同7倍。上邊三隻內券股明年PB，係全部高達兩倍樓上，預測PE 15至20倍，講PB、PE，信達係平咗50%！
呢期報載，祖國最大的不良貸款處置機構華融資產管理，計劃喺今年內上市，斷估華融上市，喺貨比貨情況底下，信達嘅PE冇理由再玩大低水。買信達，博翻一番到8.9元計數，明年預測PE先去到14倍，都仲未追到任何一家內地券商股。

錢雋
細價股專家
本欄逢周二、三、五刊出