Celine噚日出戰《全美一叮》唱《When You Believe》，雖然被評判Mel B批評揀錯歌，不過今早直播網上投票賽果，Celine順利入圍準決賽，可以同最強對手10歲「小雲妮」Angelica Hale一決高下。

剛才Celine又再喺fb玩直播，先同大家打招呼，食緊嘢嘅妹妹Dion都有入鏡，Celine就話好多謝投票嘅人，佢覺得好驚喜入到圍，Celine一開直播時已經有3百幾人睇緊，佢不時細心睇網民即時嘅留言，此外，Celine都有恭喜同樣有份晉級嘅參賽者Merrick Hanna。

獲悉Celine成功晉級，經理人蕭定一今日短訊回覆《蘋果》話：「當然開心。」問到Celine今次被指揀錯歌，下次出戰會慎重揀歌？蕭定一再次解釋：「歌是監製揀的，我哋只可以盡力爭取。」至於Celine幾時返嚟?蕭定一話未知。有冇聯絡到Celine父女？蕭定一就話：「未聯絡到，我諗佢哋仲喺個騷到，完咗佢哋會聯絡我。」