張崇基同張崇德入行20年，將於10月20日喺伊館舉行慶祝音樂會，噚日喺土瓜灣進行綵排，佢哋揀咗啲代表自己嘅歌，其中有卡通片主題曲《龍珠二世》。

張崇德嘅徒弟蔡瀚億（BabyJohn）做嘉賓，到時合唱兩首歌，BabyJohn最近忙於拍戲，但會把握時間練歌，佢話：「我今日要工作33小時，今朝拍完攀石戲，成身汗但只係帶咗底褲換。但我會搵時間練歌，沖涼時都可以練。」

另外，最近香港樂壇被批評已死，張崇基同張崇德唔認同，只覺得樂壇轉變咗模式，仲話：「只係唱片模式唔同咗，換咗生存模式，唔會死嘅。十幾年前我哋都覺得被樂壇遺棄咗，以前都有人批評我哋唔適合樂壇，但我哋行都依家。」