今年初，瑞銀陸東發表咗份報告，話嚟緊香港有機會再出現負利率，銀行存款會轉去能跟通脹對沖嘅資產，有利新一年樓市發展，強烈推介投資者買入地產股長實（001）同新地（016）。上個禮拜，中資金融股成為大戶獲利拋售對象，散戶轉炒香港地產股長實股價升穿100蚊，新地亦升至1年新高。雖然噚日長實收報101.7元，回吐1.55%；新地則收94.1元，微跌1.88%。
不過，網友Tommy1215喺《香港討論區》同周圍嘅網友講，要跟陸東買地產股，可吼長實、新地，再加恒地（012）同太古A（019），「地產股個升浪啱啱至開始，以之前中資股咁嘅升法，起碼仲有一個月大升特升。」

輪住嚟炒　終翻兜

Qqstock都睇好嚟緊嘅樓市，佢話：「𠵱家香港有咁多熱錢，加息同減息都唔再需要跟美國走，呢季一定會減息。」Ka_leong就好開心咁講：「霉咗咁耐地產股終於都威番陣喇。」但Microleo就話：「其實個市冇特別睇好地產股，只不過輪住炒作，邊隻落後咪炒邊隻囉！」
AC729係就係支持地產股，不過只係撐大陸嗰邊。Nomoremrniceguy亦好認同咁嘅投資策略，「香港嘅地產股唔受炒家歡迎，係因為一炒起就配股集資；另外，大部份股票落喺小部份嘅人手中，大戶容易控制大局。加上香港地產商最大發展空間喺大陸，咁不如買大陸地產股啦！」
睇番最近大行對長實同新地所做嘅目標價，瑞信睇長實見109.73元，仲有7.9%嘅上升空間；DBS唯高達則睇新地會上100蚊，仲有6.3%嘅升幅；而以5分滿分作為大行推介股票評分，長實得4.88分、新地就有3.95分，睇嚟大行較睇好長實。