韓國水木劇(逢周三及周四播出)近日都係金泰希同周元主演嘅SBS新劇《龍八夷》天下，《龍八夷》無論收視都口碑都好好，特別係收視成功超逾20%，成績可喜可賀，而《龍八夷》自推出以來收視都一直穩佔冠軍寶座，地位不容動搖。

不過今晚形勢或許會有啲變化，因為由張赫、金敏貞、劉五性、朴恩惠、李德華等實力派演員，演出嘅KBS新劇《生意之神─客主2015》（客主）將於今晚首播，幾位主角就寫定打氣語句叮囑觀眾記得要堅守直播。

而《客主》絕對有能力動搖《龍八夷》嘅地位，事關古裝劇一向喺韓國好受歡迎，加上張赫嘅劇集一向有收視保證，所以靠張赫拍古裝劇食糊絕對唔係難事，張赫於2010年主演KBS嘅電視劇《推奴》時，劇集最高收視更達到36.1%，同時當年仲獲得KBS演技大賞最高大賞，可見張赫有一定叫座力。

而《龍八夷》方面亦不敢怠慢，今日劇組就公開咗金泰希嘅最新劇照，只見金泰希冇乜表情，佢係VIP病房見到瞓喺病床嘅趙顯宰時，帶點幸災樂禍嘅意味。

另外，由金喜愛主演嘅《Mrs.Cop》噚晚播出一集收視以14.6%再次成為同檔嘅收視冠軍，雖然《奇怪的兒媳》噚晚大結局，但係收視都冇乜起色，以5.2%收視包尾墊底，同檔《華政》收視為10.5%，排第二位。