【跑馬地】退下火線享受人生的無綫非執行董事六嬸方逸華，前晚與愛將杜琪峯現身跑馬地的名人飯堂AMIGO，即使杜Sir最近忙於四出宣傳新戲《華麗上班族》，不過他盛裝赴會，皆因無綫訓練班出身的杜Sir，一直以來深受六嬸的賞識，當年更為他監製《審死官》及《十萬火急》等電影。
早年有傳六嬸力邀杜Sir回巢，主管電視及電影製作部，雖然最終未能成事，不過無損兩人的關係，至今仍經常相約敍舊。前晚11時30分左右，西裝骨骨的杜Sir，心情勁靚兼面紅紅在餐廳門口，過了不久見到六嬸拖着妹妹出現，他們見到門口有記者，主動笑笑口打招呼。

搭膊任影

全程心情勁靚的杜Sir更搭着六嬸的膊頭任影，問到兩人是否傾合作，六嬸笑說：「唔係，我哋食飯傾開心嘢。」接着六嬸打電話通知司機來接她，雖然杜Sir貴為中外聞名的大導演，不過他在六嬸面前，表現相當恭敬，在候車期間全程陪伴在旁，其後六嬸再說：「我哋係好朋友敍舊，你點知我哋喺度？」記者解釋是巧遇見到，後來六嬸的黑色七人車到達，杜Sir先送六嬸上車，但仍忍不住寒暄數句，待六嬸的妹妹安頓好一切後，杜Sir才與六嬸妹妹各自離去。
採訪、攝影：羅德光、畢紹基