香港國際賽12月10日舉行，在此之前，今天（3日）沙田跑馬爆到七彩，早段同尾段一樣狂爆，包括最尾第十場三班1400米，隸屬呂健威馬房之「鑽飾飛龍」在何澤堯胯下留前鬥後，衝贏排位後補上馬「估惑」，打開今季勝門，單Win及組合獨贏A3分別派353及25元。

為「鑽飾飛龍」建功的華人騎師何澤堯，連同第二場替徐雨石旗下「豹子頭」服役初出即勝，自製271倍個人孖寶，並錄得連續第二次賽事起孖，大打身價波！

講番六歲馬「鑽飾飛龍」，前季出道兩捷皆於1000米直路賽，上季交白卷冇贏過，今季捲土重來，今仗沿途走位14、14、14、1，最後一步及時追過「估惑」，粉碎「估惑」馬主即李嘉欣老爺許世勳在港養馬第100Win的美夢。連同今仗「鑽飾飛龍」暫時季內兩戰一冠一季不失三甲，同時是此駒首勝1000米以上途程賽事。

「鑽飾飛龍」馬主吳國基相當資深，佢係澳門練馬師李家輝的外父，惟賽後唔見李家輝現身，只得吳國基一人於呂健威陪同下拉頭馬，場面冷清。

第十場二至四名分別為「估惑」、「快利」及「常拼常勝」，四重彩派14萬左右。

「估惑」末段一度突圍而出，最終功敗垂成做二奶，連帶鞍上人潘頓以兩分之微敗走騎師王，並由見習騎師巫顯東以36分封王。