譚詠麟上週六（15日）颱風山竹襲港，佢首次就喺台北小巨蛋舉行演唱會，噚日返咗香港嘅譚校長，即刻同好友李克勤合體，佢哋向來都好鍾意運動，估唔到一碰面，喺室內都要打吓乒乓波。

克勤喺佢Ig貼咗兩張相，相中嘅「左麟右李」，喺一張寫住「不醉無歸」嘅木枱上，展示佢哋波拍，枱中用骰盅砌成界線，結果打成點，下一張相見到譚校長頒個獎盃畀克勤，克勤嘅老婆盧淑儀都在場，大家笑得好開心，而克勤留言︰「自己人『圍威喂』小型乒乓球單循環積分賽勇奪冠軍，Yeah！」仲tag住#一年一度自己人盛事。唔少網民見到佢哋合體就問︰「可否合體開演唱會！」

至於譚校長都好鍾意玩微博，佢噚日先至上載喺台北演唱會部分嘅相，其中一張佢拖住曾志偉嘅相，佢搞笑寫住︰「台北小巨蛋有趣照片5：誰可相依！本世紀最大秘密。」至於另一張相，有位女士企起身高舉雙手，譚校長留言︰「假如我是真的女主角胡冠珍說果然我是金的。」原來係當年佢攞台灣金馬獎男主角嗰套戲《假如我是真的》嘅女主角胡冠珍，都有嚟捧佢場。

精選娛聞，喺晒《娛果》
http://fb.com/appledailyent