【名家搶先睇】爆數效應點煉成(晉佳)
舜宇晉佳
港股話咁快再破頂,升股逾800隻vs跌股逾600隻,升勢唔算非常全面,無論資金衝科網股好,定係舊經濟股好,都只揀龍頭嚟衝,主板成交只得700億多啲,未夠千億都唔駛旨意夠錢掃到雞犬皆升,於是資金最盡只流入部分二線股,三、四線股幾乎冇受惠。
每個板塊都係唔龍頭唔買,係近期資金常態。單計科網股,只得聊聊幾隻談得上有基本因素,於是進入兩極化局面;至於傳統板塊,估值偏低殘,基金唔介意一直掃龍頭而唔追落後。過去每次港股升勢末段,未去到單日過千億成交、雞犬皆升都唔會見頂,今次相信冇例外。
舜宇(2382)公佈營運數據,主要盈利來源嘅手機鏡頭,4月出貨量4,404萬件,按年勁升1.11倍,按月升9.3%,原本大行預計4月出貨量會按月輕微回落,換言之,又爆數。
點解股票行起運上嚟,銷售次次都勝預期?因為唔單止股民,其實佢嘅客戶,都一樣睇住佢個股價、佢盤數。供應商股價係咁升,個個月爆數,客仔一定以為佢啲貨好掂,競爭對手都爭住畀訂單佢,所以客戶怕蝕底,羊群效應地送錢畀舜宇駛,如是者,舜宇爆數效應相信係咁樣煉成。
掌握財經生活資訊,即Like「蘋果ATM」fb專頁啦!
http://fb.com/appledailyatm