有「鐘錶界奧斯卡」之稱嘅日內瓦鐘錶大賞（GrandPrixd’HorlogeriedeGeneve）每年一度舉行，各國名錶挑選最優良巴閉名貴矜貴嘅精品參賽，角逐最高榮譽「金指針」大獎（Aiguilled’Or），本年度72件通過預算入圍名錶已經誕生，以前要欣賞呢啲名錶唔容易，可能要講緣份與天意，可遇不可求，愛錶之人今年終於有機會喺香港近距離欣賞呢啲傑作，下星期一連四日喺中環有展覽。

部份限量一隻獨家款

日內瓦鐘錶大賞展覽本月19日至22日喺中環東方表行旗艦店展出，八方知道呢次係大賞入圍手錶第一次喺香港舉行展覽，可以近距離欣賞幾十款限量版時計，絕對係不可多得嘅賞心樂事。講番呢個「鐘錶界奧斯卡」，參賽嘅都係頂級腕錶品牌，隻隻錶價值連城不特只，有啲仲係量產一隻嘅獨家款式，可想而知幾咁矜貴，據講參賽嘅錶款數以百計，因此入圍嘅72隻錶，可以話係精品中嘅精品，視為藝術品，值得一看。
賽事有男、女裝錶，珠寶、運動錶等多個獎項，最高榮譽大獎係「金指針」獎，評判團由各地收藏家、鐘錶專家、傳媒組成。香港首次舉行呢個展覽，大家應該估到原因，冇錯，因為華人係名錶最大買家，09年起亞洲就成為瑞士名錶最大市場，半數消費額來自亞洲，增加最快地區係香港，每年生意增加四成以上，而大陸更誇張，年增長超過五成，今次展出嘅名錶，八方相信好快就會戴在內地嘅大腕手上。

mailto:[email protected]