老，從來都係女人嘅天敵。

啱啱過咗44歲生日嘅周迅，早前播出嘅《如懿傳》，無論演技再好，但佢嘅少女版嘅「如懿」造形，卻被觀眾嫌「完全沒有少女感」。雖然周迅事後喺微博表示「變老是生命中不可跨過的一個過程。而作為演員，跨過時間的長河，就會變得無比自由。」

不過周迅呢句「自由」嘅背後，都足足經歷咗兩年嘅痛苦。最近周迅同導演陳可辛做咗個訪問。訪問中，陳可辛提到電影《你好，之華》中嘅周迅，因為有年齡感同有皺紋，令人覺得好真實、好好睇，又指《如懿傳》播出嗰陣，大家嫌周迅老嘅時候，自己有同周迅打氣，而周迅就回佢「沒事，我明白」。

對於老呢個問題，周迅就話自己喺《明月幾時有》之後（即2016年），踏入42歲的周迅，突然意識到自己年紀大，跟住之後近兩年，就一直好難過好唔開心。「這樣的情況，其實開始我是很難過的，那時候是真的真的不開心，真的不開心，每天愁眉苦臉的，去想老這件事情，拍出來皺紋這件事情，胖這件事情。」仲唔開心到幾乎每日都喊。

「那時候我真的早上起來坐在沙發上我就開始哭，陽光再好我也在哭，就是我可能沒辦法那麼快速面對人的衰老這件事情，我覺得尤其是女演員，她們希望你停留在一個青春貌美的時間段，但是有些時間她們會忽略人是不可抗拒地會走向衰老的，這是不可能的一件事情。」而周迅仲透露，拍《如懿傳》嘅初期，呢個感受都仍然存在，仲話《紅高粱》同《如懿傳》若然係遲多幾年搵佢拍的話，一定會拒絕。

除咗變老，周迅亦有講到自己開始去諗「生、老、病、死」，佢指無論係男人定女人都一定要面對衰老呢件事、亦避免唔到，周迅同時亦同意每段時間都會有唔同嘅憂慮，亦唔知自己到50歲嗰陣會點諗，但自己嘅角度嚟講，佢只係想大家知道演員要面對呢啲事有幾辛苦。

而當陳可辛提到成長衰老中，其中好重要嘅事係「生仔」時，周迅就表示自己2、30歲嘅時候特別想生，但就冇適合嘅機會，到依家嘅自己對「生仔」呢件事則保特順其自然心態。

精選娛聞，喺晒《娛果》
http://fb.com/appledailyent