眉精眼企嘅人妻鄭希怡（Yumiko），今日真人真事教了大家一課，就係買嘢要小心！

話說Yumiko上月網購比利時眼睫毛膏，等了一個月才收貨，今日佢在社交網分享：「大家近排有冇成日係ig見到呢枝嘢？一搽完d眼睫毛即刻會好長好長，一向鍾意試唔同化妝品的我，見到廣告就買咗，$200產品，$80運費，因為要在比利時運過嚟，都合理呀！等咗一個月，以為遇到騙案時，我收到啦！」

俗語話好戲在後頭，原來真㗎！Yumiko寫道：「打開包裝，個盒上面，有中文，原產地廣州！打開偉大的淘寶，um，$19.9！x$&@！瀨嘢其實都好正常，不過見到呢排d廣告賣得好多，想提一提大家，如果真係想試，淘寶啦，一樣㗎！」有網民留言：「因住有菌，小心d好！」

《蘋果》致電問Yumiko試後感，點知真係好嘅唔靈醜嘅靈！Yumiko坦言：「好多朋友問我用完點？我就試一試啦，er，用完之後，發覺所有你期待嘅效果，係全部都冇，仲有啲嗱嗱哋㖭，唔好買呀！直情試都唔使試。」係咪覺得淘寶嘢信唔過？Yumiko笑住話：「有啲係ok嘅，但呢個真係唔得囉。」

精選娛聞，喺晒《娛果》
http://fb.com/appledailyent