無綫嘅劇集質素，近年高速下降，一套膠過一套，之前仲要買埋內地嘅「極品」膠劇「膠遊記」嚟播，一班網民都力插大台，大家都話睇唔落到去，觀眾就話睇唔落去，咁一班演員又點睇膠劇呢？

早前郭晉安就接受一篇報道嘅訪問，條題係「認同TVB膠劇好唔掂郭晉安:睇十分鐘都難頂!」嘩嘩嘩，作反喇作反喇，郭晉安話無綫劇係膠劇？仲話十分鐘都難頂？

咁其實篇訪問中，安仔的確係冇講過話膠劇，只係話自己冇乜時間睇劇。但係喺高登同其他討論區都有人些牙呢篇嘢，大讚安仔夠薑痛批膠劇。就係「膠劇」二字觸動無綫神經，結果噚晚一集《東張西望》唔講馬賽，但就特地打俾出埠放緊假嘅郭晉安做電話訪問，要佢澄清一切，包括有冇講過「膠劇」二字，同有冇講過大台劇集只係頂到十分鐘，因為睇唔落云云。但係又好搞笑喎，兩位主持講到係安仔主動要求平反，而唔係大台要佢解畫喎。

主持問安仔:「報道就講你話無綫嘅劇近年就水準低落，你就幫理不幫親直認不諱…」咁大個罪名，你係安仔的話，聽到都驚啦，安仔就當然話冇啦，佢話:「冇，冇，冇講過。佢有咁樣問過，但我係唔會俾任何一個反應佢，我冇答過佢。」

主持再話:「另外個題目直情話，你睇十分鐘都難頂。」安仔即再澄清:「我冇咁講過。」又解釋係因為拍劇時唔想俾其他劇影響佢投入個角色，所以唔睇。

之後主持再引導安仔，問佢可覺得篇報道扭曲事實？安仔即話:「有好多，佢有大部份都係，有大部份唔係我想講嘅嘢，全部都唔係。」

最好笑仲係，主持問安仔，此事可有影響其度假嘅心情？其實呢，作為觀眾，可能都會覺得……《東張》唔打呢個電話嚟煩住佢，就已經唔影響佢嘅度假心情啦。

其實否唔否認都冇咩所謂，觀眾嘅眼睛是雪亮的，唔通啲劇膠，要郭晉安講先知咩？大家有睇眼睇0架嘛。