MIRROR成員Lokman、Anson Lo、Jeremy與火火，以導師身份帶領《全民造星II》參賽者到商台受訪，眾人都未如姜濤般穿着黑Tee，而昨日懷疑因為穿黑Tee而被警方截查的姜濤就未有現身。經理人花姐澄清一早已安排三人跟火火帶隊，絕非特別收起姜濤，而這幾天他如常忙碌工作。

問到姜濤昨日有否受驚？花姐說︰「驚呀！佢人好驚青，尤其屋企附近有催淚彈，佢唔驚自己，係驚媽咪落街，噚日都冇乜嘢，佢係除口罩唔慣。」講到會否提醒姜濤勿穿黑衫，她說︰「肥人會明肥人感覺，打開衣櫃全部係黑色衫，有時哀求佢試着第二隻色衫，佢點都要有啲黑色喺身，唔好怪肥人。」

對於王宗堯今晨被捕，會否擔心藝人成狙擊目標？花姐覺得於政治上表態是有點不便，她說︰「好彩姜濤仲細。」但年輕人才是搜查目標，她指姜濤表示昨日搜查期間，警員都有禮貌，她說︰「佢有表明係ViuTV藝人，但佢講嘢太細聲，對方可能聽唔到，所以無再解釋。」

問到MIRROR三位成員有否問候姜濤？Lokman說：「我都係收到WhatsApp先知，睇完嘅反應係『哈哈』，之後都有WhatsApp佢，但隔咗成個鐘先覆，因為佢電話被炸爆。」姜濤被截查一事後，問到他們是否因此不穿黑色衫？Jeremy解釋因今日服裝主題是藍白色，Anson Lo說︰「我着慣黑色衫，唔會因此改變。」Lokman坦言出街已習慣戴口罩，因為好多時沒有化妝。

採訪︰馬建華

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港