【本報訊】特區政府宣佈押後表決替補機制後，陸續有建制派議員指事先已警告政府勿硬闖，包括會計界代表陳茂波。但陳的舉動未獲其界別的選民認同，早前曾公開批評陳茂波遲遲未表態的韋志堅強調：「佢係反對就反對到底，否則就拿出理據，說服我點解要投贊成票！」
一直聲言未決定投票意向的陳茂波，在政府跪低後在其facebook透露，早於政制及內地事務局5月提交替補機制原方案時，已向政府表明反對。韋志堅卻抱極大質疑，直指陳茂波從未表態，令選民無所適從，「佢如果係反對，就一早講啦，到20萬人上街之後，你先表態，好難令人信服」。

必須按諮詢結果投票

政府尚未公佈諮詢文件，但已表明會以原方案作諮詢基礎，韋志堅稱業界普遍不認同，「剝奪港人嘅補選權牽連甚廣」，政府須格外小心；除非諮詢文件列出令人信服的替補原因，否則難以支持，「好似五區公投呢種情況，唔應該視為濫用（辭職補選）」。
他強調香港沒公投法，議員若以辭職造就變相公投，無可厚非。陳茂波已表明，早前來不及就替補機制全面諮詢業界，因此提出押後表決，計劃8月底舉行業界論壇，邀約黃仁龍、林瑞麟等負責官員出席。韋志堅力促陳茂波須按照諮詢結果投票。