楊采妮(Charlie)、馬詩慧、林煒珽同陳嘉容等，噚晚喺中環出席la prairie活動，Charlie自結婚誕下孖B後已定居新加坡，噚日再次快閃嚟香港出席活動，佢話：「BB六個月大，因為仲餵緊人奶，都唔會離開太耐，我都想訓練佢哋坐飛機，先試吓短途，因為新年想帶佢哋去台灣探太太婆，要搭5個鐘飛機。」

Charlie話孖B已經識翻身，好好玩，嚟緊返去會同佢哋練吓爬同游水：「佢哋完全唔同性格，好得意，可能喺肚入面已經知道大家係兄弟，o依家一瞓埋一齊弟弟會捲去哥哥度，哥哥又好似大呀哥咁，我o依家都瞓唔夠，但好值得。」

問到會唔會追女？43歲嘅Charlie就話年紀大，唔會考慮喇：「唔生嘞！最主要都係年紀問題，佢哋兩個已經有伴，我會唔捨得抱住個女唔抱兩個仔。」至於Charlie幾時復工？佢就話都有戲癮，但都唔能夠太長時間離開，所以等小朋友一歲後先考慮，問到會唔會考慮做真人騷？Charlie就話：「我兩個真係唔敢想像！o依家喺屋企日日都真人騷，自己影佢哋。」

提到好友郭富城榮升爸爸，Charlie就未探BB，但就好戥佢開心，佢話：「相信個女一定好靚女，跳舞好叻。」咁會唔會帶BB見面對親家？Charlie笑道：「親家就唔好嘞，我有兩個，可以做老友，我同Aaron講要好好enjoy，因為BB大得好快，希望同太太好好體驗。」

另外，林煒珽明年結婚，將會喺英國搞，但就仲未開始籌備，但就已經諗咗影婚紗相嘅細節。講到英國愛爾蘭籍未婚夫Steve經常露pat，爸爸有咩反應？煒珽話：「爹哋好鍾意睇令人笑嘅嘢，佢睇娛樂新聞會笑，佢都有讚Steve有禮貌。」而陳嘉容就性感現身，佢就話做咗手腳，用push up嘅方法，問到會唔會隆胸？佢就話：「我好開放嘅，但我冇考慮過，做模特兒有好多方法。」

相關文章：
【鷹眼唔認拍拖】謝婷婷又兜到：佢返屋企都話俾我聽，人哋問佢呢個問題
http://bit.ly/2x40nON

【繼續講鷹眼】謝婷婷話唔想俾人標籤：覺得我同邊個邊個有關係
http://bit.ly/2xFIwSF