二○○四年元旦，又係時候新年許願咯喎，七個小矮人，喺白雪公主床頭，許咗七個小小嘅願望。
第一願，就梗係美國國力繼續強大，反恐成功，橫掃邪惡軸心，世界經濟暢旺。美國愈強盛，即是定單愈多，定單愈多，即是中國廉價勞工市場開工多，亦即帶挈香港經濟好埋，嗰陣時，老董落唔落台，香港都會自動波復甦。

溫總咪再苦瓜乾
第二願，就係胡錦濤搞多啲民主開放，放寬大陸人民言論自由，准許民間辦報，監督中國政府，同埋唔好再迫害一啲好似蔣彥永醫生咁嘅有識之士，以民為本，減少啲民間疾苦！
第三願，就係中國總理溫家寶出訪外國，唔好再苦瓜乾咁嘅面口，谷住泡眼淚，好似做緊白燕張活游！同埋出席公開場合，唔好吟咁多中國舊詩，照顧吓香港電子印刷傳媒記者嘅學識水平，因為電視新聞剪接趕出街，報紙埋版趕開機，記者冇時間逐字逐句考察出處，又黃遵憲、又于右任，一陣又新詩余光中，連新聞處長同教統局局長，都唔知溫總想噏乜。講嘢要力求淺白、爽脆，好似香港啲廣告咁SoundBite開門見山：「香港腳，噴腳癬靈，一樽見效」，記者唔會寫白字，港人一聽就明，你話幾好？
第四願，就係唐英年佢老母太夫人，健康長壽！點解要祝唐老太健康呢？因為唐唐理財，靠晒媽咪自細嘅家訓，唐老太打多兩圈上海麻雀，腦部活躍啲，就可以畀多啲理財靈感畀唐唐，再加埋唐唐嘅福相，兩仔乸一拍，財赤快啲急降，香港經濟早日行大運。

第五願，就係七一大遊行一周年、六四血案十五周年、五四運動八十五周年，同埋香港重光六十缺一周年，都激發香港人民主思想，善用多個紀念日，遊行提出訴求：二○○七年特首普選、二○○八年立法會全直選，用行動向歷史交代。
第六願，就係董太、沙士、灣仔船街鬼屋凶靈呢「二○○三年香港騎呢三凶」，都順應天意民情，千祈、千祈、千祈唔好再蒲頭，唔好再為香港製造恐慌。
第七願，就係希望阿董，向南生圍嗰條鱷魚學習，就算國家唔派人落嚟將佢生擒返北京，都要盡量潛吓水，隱多啲形，就算出現，都係限於攤喺啲泥度曬吓太陽，千祈唔好開口！
咁樣唔經唔覺，香港人都會覺得阿董嘅危險性減低，啲自由行嘅大陸同胞，就會將嘉慧園當做一個瞭望觀察嘅旅遊景點，見阿董架車出入，就會好開心咁大叫：「呀，終於見到香港人個個都話最抵×嘅嗰件港嘅真人版嘞！」

咀醒昏睡老懵董
七個小矮人，七個願望，唔知會有幾多個成真？望吓張床，白雪公主瞓着咗，等緊王子嚟咀番醒佢喎！今日元旦大遊行，等我哋齊齊上街，揸住阿董幅相，咀佢一啖，希望佢由一個昏睡咗六年幾嘅夢境之中醒番喇！


傳真︰2623-9278
電郵︰[email protected]