當年今日
關於我們

【估得到仲係星爺咩】 海報又玩神秘 究竟佢係邊個?

蘋果日報 2019/01/02 15:27

周星馳

周星馳繼個幾月前釋出《新喜劇之王》首張海報之後,近日又再釋出第二張海報,同樣用手繪風格,將電影角色分為九格,但留空咗中間嗰格,印上「WHO ARE YOU」字樣,不過其實畫埋中間嗰格嘅樣都冇咩所謂,反正畫完都睇唔出係邊個,真係好難估囉!
上次釋出嗰張海報見到白雪公主手執十大武器之首嘅摺櫈,今次仲有一張海報就係影住星爺背影,同樣拎住摺櫈模仿白雪公主嘅動作,睇嚟星爺真係好鍾意摺櫈。而嗰張九宮格海報左上角都出現白雪公主身影,相信白雪公主都係主要角色,但中間嗰一格「WHO ARE YOU」會唔會係主角,咁究竟係邊個?早前就有消息話王寶強、姚晨、林允都有份拍《新喜劇之王》。
星爺上次套自導自演嘅《喜劇之王》,數數手指已經有20年咁耐,佢今次似乎特登想吊大家癮,就連宣傳手法都用唧牙膏方式,逐啲逐啲唧出嚟,唔知有冇成功吸引到大家呢?
精選娛聞,喺晒《娛果》
http://fb.com/appledailyent