早排有報道話中央政治局常委張德江南下為奶媽林鄭月娥箍票,其中一個目標係香港一眾大孖沙,而冇派任何長和系代表去奶媽造勢會、外界盛傳支持薯片曾俊華嘅長和主席李嘉誠動向,自然受政商界關注。
點知噚日網媒熱血時報就影到超人同兩個仔、長和副主席李澤鉅及電盈主席李澤楷,去咗中聯辦同官員會面。據熱血時報報道,李氏三父子喺噚日下午3點半左右到中聯辦,逗留約40分鐘後離開。片中顯示,中聯辦主任張曉明、副主任黃蘭發等人,均在門外送行,而各人均面露笑容。
超人父子係呢個咁敏感時刻現身西環,自然引起坊間好多猜測,而長和系發言人喺截稿前,未有回應事件。