廣電總局噚日發佈《境外人員參加廣播電視節目制作管理規定（徵求意見稿）》（以下稱《規定》），明確規定廣播電視播出機構，一般不得聘用「境外人員」——即外國及港澳台人士，擔任廣播電視節目主持人。（新聞連結：　 https://bit.ly/2O6RVed　）

噢，喺呢個Moment，港澳台又變成「境外」，而非「自古以來是中國一部份」……

仲有嘅就係，港澳台呢啲中國境外地方，同外國人待遇一樣，是不得在國產電視劇中同時擔任男女主角。

咁，退一萬步，唔做主持啫，做嘉賓主持得喇啩？唔得。對大陸嚟講，「嘉賓」都係主創之一。何謂「主創」？就係包括：
編劇
撰稿
導演
主要演員
主要工作人員
製片人
嘉賓

今次出爐嘅《規定》意見徵集書，連嘉賓呢個point都諗到。其中一條就係，每期綜藝類、訪談類等廣播電視節目中，聘用擔任主創人員的外國人數目，不得超過同類別人員總數的五分之一。唔使擔心，港澳台人員不在此限。

咁係咪即係話，港澳台呢啲中國以外嘅「境外人士」係唔可以主持綜藝節目，但做嘉賓／嘉賓主持，係咪得呢？

呢份《規定》，真係影響咗好多港台兩地嘅「境外藝人」，數來就有王祖藍（《奔跑吧兄弟》）、Angelababy（《奔跑吧兄弟》）、小S徐熙娣（《姐姐好餓》）、蔡康永（《奇葩說》）、謝霆鋒（《十二道鋒味》）、陶晶瑩（《看見你的聲音、）仲有就係吳宗憲、黃子佼、歐漢聲等等等等。

王祖藍就醒喇，佢話自己一直以來，都只係節目裡面嘅「固定嘉賓」！但「百度百科」就話祖藍係「固定主持」喎…

黃子佼就認為，政策不停在變，佢話：「我一向循規蹈矩，做好本分，哪裡有舞台，我就全力以赴。」

至於長年在大陸工作嘅歐漢聲，就透過經理人回應稱，目前嘅工作，係嘉賓，唔係主持人，「對於政策沒意見。」

咁，會唔會以後啲綜藝節目，得「固定嘉賓」、「嘉賓」而無主持呢？