韓國人氣選秀節目《PRODUCE 101》由騰訊買下版權開拍中國版，節目名為《創造101》，並於今年4月開播，噚日播出總決賽。最終11位成員噚日終於揭曉，並將以女團「火箭少女101」出道，有份參加嘅韓國女團宇宙少女嘅中國成員孟美岐由參賽至今都被睇好，佢噚日亦不負所望以1億8千萬票登上冠軍寶座，得獎後佢開心得爆喊，並一一答謝父母、導師及粉絲等人。

至於亞軍同樣來自宇宙少女嘅中國成員吳宣儀，可見韓國喺訓練練習生認真有一手。事實上，孟美岐同吳宣儀作為宇宙少女成員於前年2月出道，不過出道兩年都未有突破成績，所以兩人就決定暫停宇宙少女活動，返大陸參加《創造101》，由於訓練有數，令兩人一出場以十分矚目，最後成功包辦冠亞軍。

而第3名至第11名就分別為楊超越、段奧娟、Yamy、賴美雲、紫寧、Sunnee、李紫婷、傅菁及徐夢潔。不過季軍楊超越喺比賽期間，實力明顯差過其他參賽者，但最後卻以季軍選，飽受網民爭議，就連中國首富之子王思聰都批評：「YCY（楊超越）的出道是侮辱了其他十個人。」

另外，宇宙少女所屬事務所就指孟美岐同吳宣儀之後將會以宇宙少女及火箭少女101兩個組合同時進行活動，下半年佢哋就會以宇宙少女身份活動。

更多韓流，喺晒《娛果》
http://fb.com/appledailyent