八方同好多香港人一樣，幾乎日日幫襯茶餐廳，絲襪奶茶、菠蘿油可以話係香港最地道食品，民建聯蔡素玉自言係茶餐廳擁躉，下星期三喺立法會提出動議，要求政府同國家文化部向聯合國申請，將港式茶餐廳文化列入「人類非物質文化遺產」。
蔡菜子話一旦成事，有助優化茶餐廳文化同本地餐飲業，可以增加市民對香港歸屬感，甚至成為景點促進旅遊業。
蔡菜子噚日去中環蘭芳園茶餐廳，一邊嘆奶茶食西多，一邊開記招，更即席冲番杯絲襪奶茶，笑言日後唔做議員可能轉行做企堂。
蔡菜子稱已約晤民政局德成局長，要求政府放寬處理大牌檔續牌程序，保留大牌檔文化。咦？茶餐廳同大牌檔係兩樣嘢嚟喎，蔡菜子究竟想保留邊樣呢？