柬埔寨股市噚日開鑼兼且打響頭炮，而且淨係得一間公司上市，呢隻股份叫「金邊水務局」，不過佢嘅反應同表現，其實一啲都唔「水」。
佢哋嘅IPO超額認購17倍，今次佢哋發行1300萬股，每股作價6300瑞爾（約12港元），第一日開市，股價已飆升至9400瑞爾，單日升幅有成50%，最終收盤價9300瑞爾，升幅都有48%。

交易三個半鐘收工

除咗回報好，最令華華羡慕係股市開工時間勁短。柬埔寨股市交易時段由朝早8點至早上11點半，下午無市。即係無論經紀或散戶，全日只係睇三個半鐘市就可以收工，上午炒完股，下午已可以做自已嘢。柬埔寨首相洪森，無親自到場主持開盤儀式，只係預先拍咗段片祝賀。
柬埔寨當局期望交易市場能吸引更多外資，不過強國人一早收到風，已經部署好入市。
此外，內地傳媒報道，金邊水務局公佈配售結果，獲10萬股以上嘅21名投資者中，有超過一半係來自中國或有中國背景。為咗吸引投資者，國外人開設柬埔寨股票戶口手續簡單，只須遞交護照、住址證明同相片即可。
另一間國企柬埔寨電訊公司（TelecomCambodia）亦計劃稍後上市。華華心諗，與其喺港股磨爛席都賺唔到，不如衝入柬埔寨股市，分分鐘有唔錯收穫。

李華華
mailto:[email protected]