香港樂視（LeTV）突然申請清盤，大家申請樂視嘅時候，好多時都係為咗睇波，暫時睇波就未有影響嘅，不過買咗樂視超級影視會員會籍嘅用家呢，就突然做咗苦主，因為仲喺合約期內，但係會籍就可能已經永久失效喇。

由於樂視嘅會籍係一次過買六個月或者十二個月，而唔係月費，所以依家樂視突然申請清盤，變到剩低嘅合約費就白畀咁，但呢個時候，蕭定一旗下hmv數碼中國（8078）就即時推出咗一個計劃，就係用佢旗下嘅播放平台HMVOD，接收一班樂視嘅苦主。

o依家HMVOD就指，只要大家係樂視嘅樂視超級影視會員，就可以以剩依嘅合約月數轉去HMVOD，仲要一蚊都唔使畀，即係話，如果你剩係8個月嘅樂視超級影視會員，你只要去HMVOD申請，就可以免費轉做8個月嘅HMVOD會員，呢招真係高手。

而趙永洪都有幫HMV拍咗一條宣傳片，就係講佢係一個樂視苦主嘅的士司機，突然冇得睇樂視，就講晒粗口， 最後仲有關公出場。有網民都有留言，讚今次HMVOD嘅公關做得好，好可以抽水又搵到客。呢句又真呀，HMVOD嘅小編都好細心咁逐一回覆網民查詢，教埋你點樣check自己同樂視仲有冇約、甚至可以screen cap 比佢哋，好細心。

不過都有網民指，本身買樂視都係為咗睇波，HMVOD冇波睇，其實都冇用，不過網民留意返，樂視睇波，係仲有得睇嘅。

《蘋果》致電身在日本的蕭定一，佢回以三字：冇回應。

更多娛聞，喺晒《娛果》
http://fb.com/appledailyent